Bertran de Born (1140-1215)
Poèmes

Sirventes: Mei sirventes volh far dels reis amdos



Mei sirventes volh far dels reis amdos,
Qu'en breu veïrem qu’aura mais chavaliers,
Del valen rei de Castela n'Anfos,
Qu'aug dir que ve e volra soudadiers;
Richartz metra a mois e a sestiers
Aur e argen, e te s'a benenansa
Metre e donar e no vol sa fiansa,
Anz vol guerra mais que qualha esparviers.

S'amdui li rei son pro ni coratjos,
En breu veirem champs jonchatz de quartiers
D'elms e d'escutz e de brans e d'arsos
E de fendutz per bustz tro als braiers,
E arage veirem anar destriers
E per costatz e per peitz mainta lansa
E gaug e plor e dol e alegransa:
Lo perdre er grans el gazanhz er sobriers.

Trompas, tabors, senheras e penos
E entresenhz e chavaus blancs e niers
Veirem en breu, quel segles sera bos,
Que om tolra l'aver als usuriers
E pel chamis non anara saumiers
Jorn afiat, ni borzes sens doptansa,
Ni merchadiers que venga devès Fransa,
Anz sera rics qui tolra volontiers.

Mas sil reis ve, eu ai en Deu fiansa
Qu'eu serai vins o serai per quartiers,
E si sui vins, er mi grans benenansa,
E si eu moir, er mi grans deliuriers.

 


Bertran de Born

 

02 bertran de born