D’un Mire cunte qui saina
Un riche Hume que il garda
En mult très grant enfermetei;
Puis aveit le sanc cumandei
A se Fille que le gardast,
Ke nulle riens ni adésast
Kar par ce sanc bien quenoistreit
Qel enferté ses Père aureit.
La Meschine porta le sanc
En se cambre deseur un banc;
Mès mult li est mesavenu,
Car tut le sanc a espandu.
Ne l’osa dire ne mustrer,
N’autre cunseil ne
sot truver
Mais sei méesmes fist sainier;
Icel sanc lesse refreidier,
Tant que li Mires l’ot véu.
Par le sanc a aperchéu
Qe cil ert prains que lot laissié.
Le riche Hume a si esmaié
Q’ il cuideit bien aveir effant;
Sa Fille fist venir avant,
Tant par destreit, tant par amour,
Li fist quenoistre la vérour.
Dou sanc li dist q’ele espandi,
E que li autres esteit de li.
Autresi vet des Tenchéeurs
Des Lairons è des Boiséeurs
En cui la félenie maint,
Par eaus méismes sunt ataint
Qant melx se gardent si sunt pris
Si sunt encumbré et ocis.
